Villanueva: Pagbaba sa optional retirement age para sa kawani ng gobyerno, hindi magreresulta sa staffing shortage

Magbubukas ng maraming oportunidad para sa susunod na henerasyon ng mga civil servant ang pag-adjust sa optional retirement age ng mga kawani ng pamahalaan, ayon kay Senator Joel Villanueva.

 

Tinanong ni Villanueva ang mga resource person noon Huwebes sa pagdinig ng Senate civil service committee kung magkakaroon ng staffing shortage sakaling pumasa ang iba’t ibang mga panukalang may layunin na ibaba ang optional retirement age.

 

“Good news po na kahit ibaba natin ang retirement age, hindi po magkakaroon ng staffing shortage sa mga ahensya ng gobyerno,” ani Villanueva matapos ang tugon ni Civil Service Commissioner Aileen Lizada na nagpaliwanag na mataas ang demand sa mga manggagawa sa pamahalaan.

 

Binanggit ni Lizada na sa isang pagkakataon, dinagsa ng 200 na aplikante ang isang bakanteng posisyon na binuksan ng CSC, na nagpapatunay na marami ang naghahanap ng trabaho sa gobyerno.

 

Sa kabilang dako, hiningi ni Villanueva mula sa mga kinatawan ng Government Service Insurance System (GSIS) ang mga karaniwang dahilan ng mga kawani ng pamahalaan kung bakit nananatili sila sa serbisyo hanggang umabot sa mandatory retirement age na 65.

 

Sagot ng mga taga-GSIS, umaabot kadalasan ang mga manggagawa sa mandatory retirement age dahil kailangan nilang makabuo ng 15 na taong serbisyo upang maging eligible sa pension; kailangan pa nila ng sweldo para sa kanilang pang araw-araw at makabayad sa utang, at nais pa nilang magtrabaho.